Antxetako danborrada 1995. urtean sortu zen bazkide talde baten eskutik. Hauek data hau baino lehen auzoko kaleak animatzeko asmoz hiriko gau garantzitsuenean afaldu ondoren lapiko eta erratzekin ateratzeko ohitura zuten.

Bere sorreratik danborrada mistoa izan da. Hasiera batean sukaldari jantziak erabiltzen ziren. 1998. urtean Eskola dantza taldeko "alma mater" den Josetxo Fuentesen aholkuak jarraiturik urketari jantzia ere erabiltzen hasi ziren. Hau Josetxok "Gipuzkoako Urketari" jantziari egindako aldaketa bat da.

Lehenengo taldea 25 danbor, 42 barril, 4 kantinera, danborren kaboa, barrilen kaboa eta danbor nagusiez osatu zen, Berako Txarangak lagundu zien.

Juan Antonio Anterok danborradarekin duen kolaborazioa dela eta, azken urteetan Gros-eko Kaldereroekin bitan jo dugu "GURE DONOSTI" pieza, Txofre plazan. Hauetako batean konpartsa honen 25. Urteurrena ospatu genuen.

2005eko ekainaren 29an Barañaineko Udalak gonbidatu gintuen bertan urtero ospatzen den folklore jaialdian parte hartzeko. Honetan "Gallos" konpartsarekin batera aritu ginen eta honako piezak eskeini genituen: "Caballería de viejas", "Caballería de Gallos", "Marcha de San Sebastian","Himno de Navarra" eta "Antxetari".

Gaur egun Antxeta danborrada 35 danbor, 65 barril, 4 kantinera, barril zuzendari, barril eta danbor kaboak eta danbor nagusiez osaturik dago. Guztiak Barañaineko "Igandea" txarangaz lagundurik. Danbor nagusia Juan Cascante da eta barrilen zuzendaria Jose Luis Gonzalez.

Urtero urtarrilaren 20an 00:00etan elkartean bandera igotzen da. Ondoren danborrada Gros auzotik igarotzen da auzoko zenbait elkarte bisitatuz.